Додека голем број на сопственици на познати компании и брендови уживаат да бидат позиционирани на ниво со славните, голем број од нив не сакаат да се во центарот на вниманието и живеат релативно нормален живот. Овие сопственици на познати брендови - имаат славен бизнис но неславен лик:
Фил Најт - Nike
Фил Најт, сопственикот на една од најпознатите светски компании за производство на спортска опрема Nike, е човек кој нема да го сретнете по магазините, таблоидите или на телевизија. Тој својата компанија ја основа заедно со неговиот тренер по трчање. Во '60-тите во Америка не постоеле добри патики за трчање, па така Фил и Бил одлучуваат да започнат сопствено производство. Името Nike и познатото лого компанијата ги добива во 1978 година.
Хауард Шултц - Starbucks
На почетокот Starbucks започнува како една продавница која продава зрна кафе и опрема. Во 1987 година Хауард ја купува компанијата претворајќи ја во вистинска продавница за кафе. Инспириран од италијанската атмосфера во кафулињата за еспресо, тој ја претвора Starbucks во една од најпознатите светски продавници за популарниот пијалак.
Амансио Ортега - ZARA
Својот бизнис Амансио го започнува заедно со својата сопруга во '70-тите години. Тој изработува фустани и бањарки најпрво во својата дневна соба. Првиот бутик го отвора во Ла Коруња, Шпанија во 1975 година наречен Зорба. За многу брзо време ZARA започнува да расте, а голем придонес е одлуката да се започне со процесот на брза мода, односно изработка на нови дизајни на секои 2 недели.
Пер и Вини Еневолдсен - Pandora
Во 1982 година фамилијата Еневолдсен отвора мала продавница за накит во Копенхаген продавајќи парчиња увезени од Тајланд. Во 1987 нивната компанија е доста голема и започнуваат да изработуваат сопствени дизајни. Во 2000 година кога нивната позната белегзија стапува на сцена, каде потрошувачите можат директно да учествуваат во дизајнот, Pandora станува една од најпознатите компании за накит, а Еневолдсен едно од најбогатите фамилии во Данска.
Мишел Фереро - Ferrero
Мишел е наследник на фамилијарниот бизнис на производство на чоколаден крем со лешници. Неговата брилијантност, креативност и истражувањето на пазарот се тоа што ја прави неговата компанија успешна. Тој е креаторот на чоколадните Киндер јајца и се разбира популарните слатки Фереро Роше и Рафаело. Но, исто така тој е заслужен за подобрување на рецептот за чоколадниот крем со лешници и неговото популарно име Нутела. Уште еден негов генијален изум се Тик Так бонбончињата.
Рене Лакост - Laсoste
Овој познат бренд е создаден од страна на тениски играч Рене Лакост кој во 1926 година за еден од неговите турнири си шие маица со кратки ракави.Неговиот прекар бил алигатор што потоа станува и лого на компанијата. Во 1933 Рене ја отвора својата компанија за производство на маици за тенис, голф и едрење.
Лери Пејџ и Сергеј Брин - Google
Google е создаден од двајца студенти на универзитетот Стенфорд во 1998 година кога името google.com е официјално регистрирано. Името е создадено од англискиот збор гоогол што означува број со 100 нули. Денес Google е еден од најкористените онлајн пребарувачи.
Кевин Систром - Instagram
Познатата мрежа Инстаграм е создадена од уште еден студент на Станфорд универзитетот, кој својата љубов кон фотографијата ја преточува во една од најпознатите социјални мрежи на денешницата. Инспириран бил од обичен фотоапарат кој произведува наједноставни фотографии и го креира првиот филтер X-Pro II. 2 години по лансирањето апликацијата ја купува Фејсбук за 1 милијарда долари.
