Зоран Ванев – од фолк пејач до надрилекар во Швајцарија: Со надрилекарство заработувам повеќе од хирург

Своевремено еден од доста популарните фолк пејачи кај нас, но и во соседството, штипјанецот Зоран Ванев, веќе неколку години наназад е еден од најбараните доктори за природна медицина во Швајцарија. Неговата клиника во Цирих станала место кое што го посетуваат луѓе од целиот свет, и тој вели дека воопшто не жали што микрофонот го заменил за белиот лекарски мантил и пеел само на одредени и професионално организирани настани, бидејќи отсекогаш сакал да им помага на луѓето.

Бил шокиран кога изгледал емисија на една македонска ТВ станица, во која што познавачка на чаеви на своја рака препорачува лекување на сериозна дијагноза, и тврди дека кога во Швајцарија би се случило такво нешто, станицата би била затворена во рок од 24 часа. Иако работата му одела доста добро, сепак открива дека не би се вратил во Македонија, и не би отворил своја клиника кај нас, бидејќи нашиот здравствен систем не одел во правец на задоволување на пациентот, туку во правец на економијата, и ги погазувал сите човечки вредности на квалитетен живот.

,,Мојата ординација се наоѓа на самата железничка станица во Шлирен – Цирих,    Швајцарија. Дипломирав на Парацелсус Академијата за Алтернативна медицина во     Цирих, и сум првиот Македонец во Швајцарија кој ја има титулата Доктор за     природна медицина, која е призната во целиот свет, како и во сите установи на    државно ниво во Швајцарија, за која секој пациент кој во здравственото осигурување има Алтернативна медицина, му се враќаат парите назад во согласност со процентуалноста која ја има склучено во самото здравствено осигурување. Воедно мојата фирма е и сертифицирана за здравствени  осигурувања, така да во секоја смисла компетентноста ја имам во целост’’ – раскажува Ванев.

Тој додава дека се занимава со лекување на сие врсти на болести, без ограничувања, и има голем број на задоволни пациенти.

,,Јас како и секоја професија, потполно професионално и одговорно ја доживувам природната медицина, така да доколку сакате да бидете успешен и компетентен морате да посветите  исклучително внимание на сето она што го работите, и меѓу другото, со голема  љубов да го правите сето она што сакате да го правите. Студирав на  академијата полни 4 години, и тоа од понеделник до недела.

Неслучајно ме  снема од сцената, затоа што отсекогаш ме привлекувала медицината која е поврзана со природата, и последиците по здравјето на луѓето се безопасни и  многу суштински, кои се во состојба на потполно лекување на било која болест, без разлика на комплексната ситуација, за разлика од други медицини кои само го залекуваат симптомот, меѓутоа главниот проблем си останува, или се повеќе се  наштетува на другите органски функции со прејаките и пренападни медикаменти кои се од исклучиво хемиски состав, за разлика од природната медицина која продуктите ги црпи исклучиво од природата.

Конкретно се занимавам со лекување на сите врсти на болести без ограничување. Има болести за кои според швајцарскиот закон мора да сум во комуникација со доктори и специјалисти од школската медицина (како на пример оперативни интервенции или инфекциски заболувања), има болести за кој имам потполна ингеренција. Што значи дека мора да се запазат сите принципи на законска регулатива за да крајниот ефект биде неприкосновен’’ – тврди Ванев, додавајќи дека го посетуваат луѓе од многу земји.

,,Имам пациенти од секаде, да, може да се каже и од целиот свет. Природната     медицина е во голем подем затоа што луѓето полека го спознаваат ефектот на    природата и природниот лек. Често пати многу негативно се изненадувам кога ќе прочитам по некои социјални мрежи напишани рецепти или насоки за природни   состојки, за кои луѓето повеќе од мака ги употребуваат, а притоа да не бидат   запознаени со суштината на еден здравствен проблем. По мое мислење тоа е само едно негативно и нестручно помагање на пациентите, кои за многу кратко време се разочаруваат затоа што очекувањата нема да имаат таков  ефект, за кој имаат прочитано.

Каде лежи проблемот? Едноставно за да имате ефикасно лекување потребно е   целосно испитување на човекот со сите потребни анамнези и анализи. Тоа значи во мојата клиника најпрвин се земаат сите податоци на клиентот до денешен ден, со какви се болести имал контакт досега, какви се лекови има примано, дали  има фамилијарни здравствени или психички или било какви проблеми, па и финансиски.    Потоа одиме на испитување на крвта’’ – вели Ванев, давајќи осврт на процедурите на лекување кои што ги користи.

,,За да го прегледаме внатрешниот свет на човекот мораме да влеземе и во внатрешниот свет со неколку помагала, а тоа се: Темнополната Микроскопија преку која ги разгледуваме во крвта сите показатели кои се многу важни во еден процес на лекување, а тоа се распознавање на крвните зрнца, дали се нападнати и евентуално од што се нападнати. Дали имаме доволно крвни зрнца, дали имаме доволно одбрамбен систем, дали имаме агресивни бактерии, дали има енергија во самите крвни зрнца, и.т.н.

Да не набројувам уште многу стручни показатели, па потоа се оди на  следен чекор, а тоа е лабараториско испитување на други позиции како на пример хорестерол, лактоза, шеќер, триглицериди и евентуална седиментација на еритроцитите за евентуални внатрешни инфекции.

Потоа за помошен апарат ја имаме и  Ирис дијагностиката  која ни помага во евентуалниот показател кој орган би бил на некој начин осомничен во целата процедура на лекување.  Откако сите показатели ќе се на маса, се прави детален план и програма и се  пристапува на проблемот. Дали преку продукти или ќе се употребат и други апарати во правецот на електотерапија, ултрашалтерапија, биорезонантна терапија и.т.н. Само така сериозно и темелно пристапуваме на озбилните проблеми со кои треба  да се занимаваат исклучително стручните лица во една таква комплексна медицина како што е природната медицина’’ -појаснува тој.

Раскажува и за неговите впечатоци од емисии за лекување со билки, но и совети за природни лекови на разни интернет страници, на кои што голем дел од јавноста им верувала и ги применувала.

,,Многу ме погодуваат емисиите од типот на  лекување со природни чаеви или некакви продукти на некоја од ТВ програмите во Македонија, без притоа да го запазаат ефектот на контраиндикациите или стручност за самите материјали кои се наоѓаат во една билка, корен или било што. Повторувам дека без подетални резултати ние овде во Швајцарија не смееме ниту да препорачаме, а камо ли да ,,лупетаме,, на ТВ екраните како да се реши некој озбилен проблем.

Пред едно 6 месеци дури слушнав на една ТВ станица  во Македонија, еден човек боледува од гастритис, со препорака од дотична познавачка на чаевите, му препорачува да не ги пие препишаните лекарства од  доктор, туку да си земе некои си чаеви и нема да има проблем??? Во Швајцарија таква ТВ станица би била затворена за 24 часа! Дури до таква сериозност ризикуваат многу ТВ станици, што одговорноста за несакани последици сепак на крајот мора некој да ја преземе. Мислам дека ме разбравте што сакам да кажам’’ – вели Ванев.

Околу отворање на негова клиника во Македонија, појаснува зошто тоа нема да се случи во блиска иднина.

,,Имам голема желба да отворам клиника во Македонија, меѓутоа засега тоа е невозможно. Не од причина што немам доволно време, туку од причина што здравствениот систем во Македонија не оди во правец на задоволување на пациентот, туку повеќе оди во правец на економија која ги погазува сите човечки вредности на квалитетен живот. Не случајно го зборам ова, затоа што на оваа тема аргументирано и стручно можеме да дебатираме, но за тоа ќе треба друго интервју и многу поголем простор.

Со самото тоа дека луѓето преку своите примања плаќаат енормно висок процент за здравство, да на крајот бидат оставени на милост и немилост приватно да си го плаќаат секој преглед или интервенции, а кутрите луѓе, посебно пензионерите цел живот плаќале за удобна старост со надеж дека здравството ќе им биде еден ден од голема заштита. Само тоа е единствената пречка засега, затоа што ни на крај памет не ми доаѓа да бидеме платени од народ кој кутриот едвај сврзува крај со крај.

А таканаречените богаташи во Македонија со многу висок процент се стекнати на било каков начин, само не на чесен, за таквите колку и да сакаат да платат за нив нема место во мојата установа! Јас сум народен човек и останувам таков’’ – потенцира Ванев.

Околу настапите и концертите, вели дека љуовта кон музиката никогаш нема да исчезне од неговиот живот, но со текот на годините научил да се цени себеси повеќе, и да избира со кого ќе соработува.

,,Мојата прва професија никогаш не би ја изоставил , затоа што таа е мојата прва професионална радост. Нејзе ја работам со љубов и не би се откажал никогаш. Меѓутоа ја работам многу одмерено и многу сентиментално, а тоа значи со луѓе и организатори кои се големи професионалци и бараат квалитет. Така да моите гостувања, како на пример во Австралија, се стандардни и таму сум задолжително еднаш годишно. Низ Европа исто така настапувам по мој избор, и не би сакал да се најдам во ситуации како порано, пееш, а не знаеш ни каде, ни со кого мораш да си имаш работа.

За жал музиката оди во многу лоша насока, и што е најтрагично, ја предводат луѓе кои воопшто немаат компетентност, а и стручност во тоа, туку направија обичен валкан бизнис со кој повеќето на таканаречената естрада се исмејуваат, а не уживаат во музика. Затоа и светот на музиката стана повеќе изживување, а не уживање’’ – раскажува пејачот, а сега и доктор, кој што зад себе остави голем број на фолк хитови, и често настапуваше низ Австралија со големи балкански музички имиња.

,,Ако погледнеме во денешно време кои се звезди во музиката, ќе наидеме на многу мал процент на стручност и квалитет. Се повеќе старлетите и децата се користат во таков бизнис, затоа што доаѓаат многу побргу до реални скандали, а скандалите секаде во светот се најмногу продавани. Никој на земјината топка не го интересира доброто на луѓето, секого го привлекува скандалот, валканите работи и катастофите кои од ден на ден се се поголеми во човечки смисол. Не знам како ги сфаќаме причините, јас ништо не сум сменил, туку само се надоградив себеси во области кои очигледно кај многумина побудуваат забуна.

Секој човек е должен себеси во животот да се надградува и да го достигнува своето достоинство и ниво во животот, за кои можеби и самиот не е свесен за што се може да биде надарен. Така да, во тој смисол јас сум побогат за уште една професија која во животот ме прави многу посигурен, самоуверен и ми дава енергија и моќ да придонесам многу повеќе на овој свет отколку само со едно’’ – вели Ванев, додавајќи дека многумина биле изненадени кога го забележале во бел мантил, бидејќи народот свикнал да го гледа во сосема друго издание на сцената.

,,Потполно ги разбирам моите пријатели и познаници кога ќе се зачудат и одеднаш сами се прашуваат како сега од пејач отиде да работи и со осигурителни компании како што се здравствените осигурувања, или ете сега е доктор на природна медицина!!! Ние сме научени некако, како ќе се етикетираш уште од млади години така мораш и да останеш во животот.

Јас така го сфаќам богатството на еден човек, да не стои во место туку да напредува во секој поглед, затоа што еднаш живееме и мораме тоа максимално да го искористиме. Секоја лоша мисла се враќа како бумеранг, и те уништува! Затоа бидете краетивни, позитивни, дознајте што сакате и имајте цел во животот’’ – порача Ванев.

www.heilpraktikerzentrum.ch е интернет страницата со повеќе податоци за неговата работа како доктор во Швајцарија.

извор: интерјву на Вики Клинчарова - fokus.mk - 

Влатко Ѓорчев открива зошто ги бранел пратениците - Џафери е нелегитимно прогласен за спикер

„СДС изврши обид за државен удар. СДС го погази Уставот, законите и деловникот за работа на Собранието на Република Македонија. СДС ја погази демократијата во обидот да го прогласи Талат Џафери за Претседател на Собранието. Одговорност за ваквото антидржавно однесување мора да има. СДС изврши политичко насилство кое подоцна резултираше со физичко насилство.

Ниедно насилство не смее да се оправдува, но СДС има најмалку право да ги прогласува за терористи народот и граѓаните на Македонија кои 60 дена мирно протестираа и без ниту еден инцидент го изразуваа своето несогласување со Тиранската платформа и распродавањето на државните и националните интереси.

Одговорност за насилството мора да има. Не смее пратеник, па макар бил и Зоран Заев да издава наредби за да се пука во Собранието на Република Македонија. Тоа е невиден преседан не само во Македонија туку било каде во светот. Дали Зоран Заев е свесен за последиците од пукањето доколку некој куршум или рикошет завршеше во некој од граѓаните? Дали полицискиот службеник кој го послушал Зоран Заев е свесен дека тој не смее да постапува по партиски наредби, туку единствено согласно законот и процедурите?

Одговорност мора да има. Целата јавност беше сведок како Зоран Заев отпочна со реализација на црното сценарио од Тиранската платформа. Целата јавност беше сведок на срамниот и шверцерски обид да се заобиколи Уставот, законите и деловникот на Собранието на Република Македонија. Секое кршење на законите и процедурите води во насилство и анархија. Зоран Заев беше свесен за тоа. Зоран Заев свесно одлучи да ги испровоцира и предизвика граѓаните, реализирајќи го овој срамен чин после 18 часот, во времето кога веќе два месеци пред Собранието мирно протестираат стотици илјади граѓани од иницијативата „За Заедничка Македонија“. Зоран Заев се надеваше дека доколку се излие револтот на граѓаните, на таков начин ќе го покрие политичкото насилство на СДС.

Еве кои се одредби ги прекрши СДС во обидот да си прогласи свој Претседател на Собранието на Република Македонија.

Конститутивната седница има легитимен претседавач согласно Уставот и Деловникот. Член 63 од Уставот вели дека Конститутивната седница ја свикува претседателот на Собранието од претходниот состав и само доколку не се закаже конститутивна седница во предвидениот рок, пратениците сами се состануваат и го конституираат Собранието на дваесет и првиот ден од денот на завршувањето на изборите.

Член 9 од Деловникот на Собранието вели: 

(1) Доколку првата седница на Собранието не ја свика претседателот на заминување, а ја свика седницата се одржува на дваесет и првиот ден од завршувањето на изборите, во 10,00 часот, а ја свикува најстариот по години избран пратеник, ако и тој одбие да ја свика, тоа право преминува редоследно на наредниот по години избран пратеник, се до избраниот пратеник кој ќе се согласи да ја свика првата седница. Во овој случас седницата беше свикана од досегашниот Претседател Трајко Вељановски во претходниот состав, а актуелен пратеник. Значи сосема легитимно и согласно уставот и законите и деловникот.

(2) Пратеникот кој ја свикал првата седница, тоа е Трајко Вељановски, претседава со седницата на Собранието (во натамошниот текст: претседавач), додека новоизбраниот претседател или еден од потпретседателите не ја преземе должноста.

Бидејќи Конститутивната седница беше свикана во предвидениот рок, како што сите знаеме, од претседателот на претходниот состав тој и претседава со неа, токму како што вели став 2 од Член 9 од Деловникот. Само доколку претходниот претседател не ја свикаше Конститутивната седница, а ја свика тогаш согласно одредбите седницата ќе ја свикаше најстариот пратеник и истиот ќе претседаваше со неа. Во овој, деветти состав на Собранието најстар по возраст пратеник е пратеникот Бранко Маноиловски од ДУИ.

Согласно кажаното, целосно нелегитимна, противуставна и противделовничка е улогата на Ферид Мухиќ како претседавач, кој всушност не е ниту најстар пратеник во овој состав на Собранието, ниту пак беше најстариот пратеник во салата, ниту пак има деловничка оправданост за друг претседавач на Конститутивната седница освен досегашниот претседавач Трајко Вељановски. Преседан е произволното одредување и назначување на претседавач вон секаква деловничка процедура!

Член 68 од Деловникот го уредува времетраењето на седниците:

(4) Седница на Собранието се одржува во времето од 11,00 до 18,00 часот, со пауза од еден час, ако претседателот на Собранието, за одделни седници поинаку не одлучи.

Бидејќи поинаку не беше одлучено, ниту договорено, претседавачот на Конститутивната седница 20. продолжение од истата, одржано на 27.04.2017 година, деловнички го затвори во 18,00 часот и ги извести пратениците, медиумите и јавноста дека следното продолжение ќе се одржи утредента, со почеток во 11,00 часот. Одржувањето на следното 21. продолжение беше договорено по претходна консултација со сите политички партии.

Оттука, обидот да се глуми ново продолжение на Конститутивната седница е нелегитимно и претставува кршење на одредби од Деловникот и Правилниците за работата на Собранието кои се однесуваат за свикување и организирање на ново продолжение на седница. Собраниската служба ги реализираше сите предвидени чекори и обврски за свикување на следното 21. продолжение. Беше испочитувана процедурата во електронскиот систем е-Парламент, со нотификација која ја добиваат сите пратеници на своите службени имеил адреси. Така се свикува седница, а не со станување од место. Воедно, е-Парламент системот поврзан со официјалната веб страница на Собранието го евидентираше 21 продолжение на Конститутивната седница за 28.04.2017 година во 11,00 часот што беше видливо за медиумите и граѓаните.

Законот за Собрание предвидува јавноста на седниците. Во конкретниот случај немаше пренос на седницата, ниту пак имаше соодветен превод, а Талат Џафери си се обраќаше исклучиво и само на албански јазик.

Членот 80 од деловникот јасно укажува дека не смее една точка да се затвара, додека не се исцрпат дискусиите по неа. Ниту еден член од Деловникот не може и не смее да се толкува изолирано од останатите членови. Член 78 не може да се толкува без да се има во предвид член 80, што значи редоследот на точките од утврден дневен ред може да се менува единствено по завршен претрес на отпочната точка по која тече расправата.

Во целокупната историја на работењето Собранието на Република Македонија, на одржани илјадници седници, со илјадници и илјадници точки по кои пратениците расправале, не постои ниту еден пример, никогаш во ниту еден случај, кога во тек на расправа по некоја точка, расправата била прекината и се преминало на друга точка од утврден Дневен ред. Затоа таков пример не беше споменат и посочен од пратениците кои упорно настојуваа да се прекине отпочнатата расправа и да се премине на следната точка.

Со актот на СДС се суспендираше и правото на комисијата и други пратеници да дадат свој предлог за Претседател на Собранието. Со актот на СДС се суспендираше правото на комисијата и на други пратеници во Собранието на Република Македонија да дадат свој легитимен законски и деловнички предлог за Претседател на Собранието.

Член 22 вели

(1) Кандидат за претседател на Собранието може да предлага Комисијата за прашања на изборите и именувањата или најмалку 20 пратеници.

(2) Пратеник може да биде предлагач само на еден кандидат за претседател на Собранието.

Со преминување на точка 4, беше суспендирано правото на сите останати пратеници да предложат свој кандидат за претседател на Собранието, како и правото утврдено со деловникот Комисијата за прашањата на изборите и именувањата да даде предлог!

СДС тотално ги погази и одредбите кои се однесуваат на евидентните листи кои се изготвуваат за седниците. Сведоци сте дека секогаш има евидентна листа на која секогаш пратениците се потпишуваат за присуство, а тоа го немаше.

Член 30 гласи: Пратеникот кој е спречен да присуствува на седницата на Собранието, е должен за тоа да го извести претседателот на Собранието до почетокот на седницата. Таква работа немаше.

Член 32 гласи: За присуство на пратениците на седниците се води евидентен лист што е отворен во текот на одржување на седницата, кој што сега го немаше, а на крајот од работниот ден се предава на претседателот на Собранието, што сега не се случи.

На импровизираното нелегитимно продолжение немаше пријавување на присутни ниту отсутни пратеници, ниту постои било каков евидентен лист!!

СДС тотално ги погази и одредбите кои се однесуваат на утврдувањето на неопходниот кворум за работа на Собранието.

Член 95 вели: Собранието може да одлучува ако на седницата присуствува мнозинство од вкупниот број пратеници. Собранието одлучува со мнозинство гласови од присутните пратеници, а најмалку со една третина од вкупниот број пратеници, ако со Уставот не е предвидено посебно мнозинство. Претседателот на Собранието го соопштува бројот на пратениците што гласале “за”, “против” или “воздржано”, како и бројот на пратениците што се присутни. Дали некој прочита број на присутни пратеници? Апсолутно не. Претседателот на Собранието може да определи да се утврди бројот на присутните пратеници со броење. Што не беше случај. Утврдениот број на присутни пратеници се смета за точен сé додека претседателот или еден пратеник, чие барање го поддржуваат најмалку десет пратеници, не побара повторно да се утврди бројот на присутните пратеници.

На импровизираната, нелегитимна седница не беше утврден кворум, воопшто не постоеа услови кворумот да биде утврден, така што се доведува во прашање бројот на пратеници во салата и кворумот за работа!

Политичкото насилие на СДС го погази и член 107 кој вели: За работата на седницата на Собранието се водат стенографски белешки. Каде е стенографот? Составен дел на стенографските белешки се и не одржаните говори на пратениците што на седницата во текот на претресот писмено се приложени со ознака дека говорот не е одржан на седницата. Стенографските белешки за работата на седницата на Собранието се чуваат во документацијата на Собранието, во електронски дигитален формат и во тврда копија. Сега ги нема. Стенографските белешки се објавуваат на Интранет (внатрешна мрежа на Собранието) и на веб страницата на Собранието (Интернет).

Не постојат стенографски белешки од оваа импровизирана, нелегална и фиктивна седница!!

СДС направи преседан и ги погази сите одредби кои се однесуваат и на самиот чин на гласање.

Член 96 

(1) Јавното гласање се врши со употреба на технички средства или со кревање рака. Технички сретства се дугмињата кои ги има пред секој пратеник со гласање За, Против или Воздржан.

(2) Начинот за употреба на техничките средства се уредува со акт што го донесува генералниот секретар на Собранието.

Службата која раководи со техничките средства беше изолирана, немаше можност за гласање со технички средства како што е вообичаено!!

Во конкретниот случај СДС фиктивно си го утврди бројот на пратеници кои гласаа за нелегитимниот предлог, без утврдување на гласови за, против и воздржани, спротивно на Член 26.

За претседател на Собранието е избран кандидатот кој добил мнозинство гласови од вкупниот број пратеници. Ако за претседател е предложен еден кандидат и ако при првото гласање не го добие потребното мнозинство гласови, се повторува целата изборна постапка.

Криминалната одлука на СДС не е објавена, ниту пак може да биде објавено нешто што е незаконско во Службен весник, иако Законот за Собрание и членовите 37 и 39 го предвидуваат тоа. Таа фиктивна одлука и формално правно не постои.

Таква незаконска одлука и не може да постои затоа што СДС во нивниот обид за државен удар ги исклучи службите на Собранието, чија работа е дефинирана со членот 40 од Закон за Собрание и членот 235 од Деловникот.

Сумарно прекршен е уставот на Македонија, прекршени се еден куп закони, прекршен е деловникот на Собранието на Република Македонија во еден куп свој членови и ставови.

За се ова одговорност мора да има! Насилството врз процедурите е исто така насилство врз демократијата“ изјави Владимир Ѓорчев на денешната прес конференција.

ВИДЕО: Снимка од приведените тепачи на пратеници

Телевизија Алсат-М го сними спроведувањето во Кривичниот суд на дел од приведените учесници во упадот во Собранието, при што беа претепани пратеници од парламентарното мнозинство.

Како што извести ОЈО, седум лица од петнаесетте осомничени за насилствата во Собранието се лишени од слобода. Од осомничените, за 14 е определена мерка притвор, а за едно лице предложени се мерки за претпазливост.

 

 

Најчитани

Твитови