„Скапоцените камења“ на скопската Чаршија стануваат видливи преку мобилна апликација

Почнувајќи од денеска, посетителите на стариот дел од Скопје – Чаршијата, ќе имаат можност да ја доживеат на целосно нов начин. На нивно располагање ќе биде мобилната апликација „Скопските скапоцени камења“ (Skopje Gems), со која на посетителите им се нудат седум туристички рути низ Чаршијата и водич до врата на сопствениците на продавниците со стари занаети, вкусна храна, како и до музеите, религиските обележја и историските места во стариот град.

Апликацијата која е достапна на десет јазици беше развиена од Институтот за стратешки истражувања и образование (ИСИЕ), со помош на грант доделен од Регионалниот совет за соработка (РСС), преку Проектот за развој и промоција на туризмот што е финансиран од Европската унија и кој е наменет за унапредување и меѓународна афирмација на регионалниот културолошки и авантуристички туризам што го нуди Западен Балкан.

„Мобиланата апликација ‘Скопските скапоцени камења’ е освежувачи туристички производ. Тој покажува како технологијата може да биде аплицирана во туризмот и како преку раскажување на приказни преку вакви апликации се промовираат дестинациите и локалниот бизнис“, изјави Снежана Дервишкадиќ, лидер на Проектот за развој и промоција на туризмот на РСС, на денешната промоција во Скопје.

„Освен што ја раскажува приказната за скопската Чаршија, дополнителна вредност е тоа што ги води посетителите до нивните домаќини, сопствениците на дуќаните, кои секој посебно има своја приказна за раскажување, што значи дека посетата на Стариот град ќе биде уште поинтересна и поуникатна“, додаде Дервишкадиќ.

Основната идеја што не водеше при развивањето на апликацијата „Скопските скапоцени камења” – кратенка од „Скриениот скапоцен камен на Скопје – Стариот град“ е тоа што, сакавме да го направиме културното наследство на Скопје, Чаршијата, достапно за што повеќе луѓе. За разлика од традиционалната масовна продукција што ја презема целиот свет, нашата Чаршија сè уште е домаќин на некои од старите традиционални занаети, како што се капи, папучи и правење свеќи, ковач и резба. Се надеваме дека ќе ги зачуваме овие занаети така што ќе ги претвориме во туристичка атракција што ќе создаде долготрајни спомени за нашите посетители “, изјави Мишо Докмановиќ, претседател на Бордот на Институтот за стратешки истражувања и образование.

Апликацијата е бесплатна преку „Ап стор“ (App Store) и „Плеј стор“ (Play Store) и ќе биде широко промовирана почнувајќи од скопскиот аеродром преку хотели, туристички инфоцентар, агенции, барови и ресторани, како и преку интернет и преку социјални медиуми.

Второ издание на „Пехчево на точак“ Второ издание на „Пехчево на точак“ | opserver.mk

Во Пехчево се одржа по втор пат спортската манифестација „Пехчево на точак” – искачување со велосипеди до врвот Кадиица во организација на хотел „Гогов“ со поддршка на Оштина Пехчево. Како што истакна градоначалникот Драган Тренчовски, трката беше одлична можност да се промовира авантуристичкиот туризам во Пехчево и регионот.

-„Пехчево на точак” имаше повторно иста цел, а тоа е да го разбудиме авантуристичкиот дух, да поттикнеме дружење, создавање нови пријателства, да ги истражиме и доживееме убавините на пехчевската природа и малешевијата кои нудат огромни можности за развој на авантуристичкиот туризам. Годинава имавме посебна чест на настанот да учествува словачкиот амбасадор Хенрик Маркуш кој и самиот е велосипедист во слободното време, информираше Тренчовски.

Како што истакнаа организаторите, со оваа трка хотел „Гогов“ ја покажува својата општествена одговорност во насока на промоција на пехчевскиот регион.

-Сакаме на овој начин да придонесеме за промоција на овој прекрасен, а подзаборавен регион во Македонија. Планот е овој настан да стане традиција, а следната година да биде и далеку помасовен со вметнување нови елементи во организацијата, и со логорувања, музички делови и многу дружење на Равна Река во Пехчево, велат организаторите.

Велосипедската патека по која се движеа велосипедистите е долга 27 километри, со вкупна висинска разлика од 1150 метри. Освен велосипедската трка, како дел од настанот се одржа и „оф-роуд” тура со теренски возила на која учествуваа учесници од Пехчево, Берово и од Делчево. Настанот заврши со заедничко дружење на градскиот плоштад каде учесниците од страна на организаторот добија благодарници.

Над 48.000 посетители на Саемот на книгата

31. издание на Саем на книгата 2019, кој траеше од 8 до 14 мај, вчера се затвори и ја надмина вообичаената посета од страна на читателите. Заклучно со вчерашниот ден, саемот го посетија 48.000 обожаватели на пишаниот збор од кои 40% беа ученици.

Соработката со Република Унгарија и унгарската амбасада во Република Северна Македонија, кој оваа година беше земја во фокус на саемот, како и соработката со ЈСП со воведувањето на двете вонредни линии за полесен пристап на посетителите до најголемата културна манифестација, резултираа, покрај промената на локацијата на Саемот на книгата, овој саем оваа година да го зацврсти своето постоење, без разлика на местоположбата.

И оваа година ја добивме поддршката од Министерството за култура на Република Северна Македонија, што беше исклучително важно за самата манифестација и за издавачката дејност. Овој саем ќе го паметиме по бројните промоции на нови изданија на книги од издавачите, по бројните гостувања на домашни и странски автори, но и по зголемената бројка на посетители на саемот на книгата“ – изјави Сања Кондарко, проект менаџер на Саемот на Книгата.

Во рамките на програмата на Промотивниот центар се доделија наградите во организација на Македонската асоцијација на издавачи (МАИ), како и доделувањето награди организирано од страна на Здружението на издавачите и книжарите на Македонија (ЗИКМ).

На 31. издание на Саем на книгата 2019, кој се затвори вчера, се претставија околу 70 издавачки куќи од Северна Македонија, како и од Унгарија, Србија, Косово, Албанија и Данска.

Саемот беше организиран под мотото 31 година Читај со задоволство!

Најчитани

Твитови