Валтери Ботас триумфираше на трката за Големата награда на Турција во Формула 1 шампионатот, а нов лидер во генералниот пласман е Макс Ферстапен.
Финскиот возач во болидот на Мерцедес стигна до својата прва сезонска победа откако стартуваше од првото место. Зад него финишираа двајцата возачи на Ред Бул, Макс Ферстапен и Серхио Перез. Четврти беше Шарл Леклер, додека петтото место му припадна на актуелниот шампион Луис Хамилтон.
Британецот вчера беше најбрз во квалификациите, но стартуваше од 11-тото место поради промени на неговиот мотор. Брзо се проби кон водечките возачи, но неговите шанси за подиум ги уништи лошата тимска тактика. Во поени влегоа и Пјер Гасли, Ландо Норис, Карлос Сајнц, Ленс Строл и Естебан Окон.
Со денешното второ место Ферстапен го презема првото место во генералниот пласман со 262,5 бода, додека Хамилтон сега е втор со шест бодови помалку. Ботас е трет со 177, а Норис е четврти со 145 бодови.
Со денешното гран при завршија и европските трки, па Формула 1 за две недели ќе се пресели во САД. До крајот на сезоната има уште вкупно шест трки.