Државната матура ќе биде приспособена на состојбата во образованието и ќе биде олеснета за оваа генерација матуранти која беше најмногу погодена од прекините на наставниот процес.
Три од четирите барања на Сојузот беа прифатливи за МОН, по што Генералното собрание на Сојузот на средношколци го прифати компромисот.
Ќе бидат обезбедени банки со прашања за интерните испити и овие испити ќе носат повеќе поени при уписот на факултет. Понатаму, ќе се намали бројот на прашања и бодови на првиот екстерен испит, а тој ќе се смета за соодветен на сите студиски програми, што значи дополнителни 2 поени при уписот, појаснува Сојузот на средношколци.
Банките со прашања за интерните испити ќе бидат споделени најдоцна 4 недели пред испитот. Овие банки ќе содржат број на прашања три пати поголем од бројот на прашања на испитот, што според Сојузот е значајно олеснување за матурантите бидејќи ќе имаат доволно време соодветно да се подготват за интерните испити.
Наместо одложување на датумот на првиот екстерен испит, Генералното собрание на Сојузот ја прифатило понудата на МОН да се намали обемноста на испитот. Истиот ќе носи од 60 до 80 бодови, наместо досегашните 80 до 100, што значи дека ќе има намалување на бројот на прашања.