Експертите од американската Управа за храна и лекови (ФДА) ја препорачаа вакцината на „Фајзер/Бионтек“ да им се дава на деца од пет до 11-годишна возраст.
Со вакцината на „Фајзер“ веќе се вакцинираат децата од 12 години па нагоре, а минатиот месец компанијата информираше дека вакцината е безбедна и за децата на возраст од 5 до 11 години.
Официјалните податоци од САД покажуваат дека 160 деца на возраст меѓу пет и 11 години починале од коронавирус од почетокот на пандемијата. Во САД од вирусот починале вкупно околу 740 000 луѓе.
Пред две недели европската агенција за лекови (ЕМА) соопшти дека ја проценува вакцината на „Фајзер“ за истата возрасна група.
Вакцината со две дози, базирана на новата мРНА-технологија, произведува силен имунолошки одговор кај деца на возраст од пет до 11 години, покажа клиничкото испитување на 2 268 учесници, објавија компаниите минатиот месец.
Покрај вакцинирањето на децата, регулаторот и производителите на вакцини размислуваат за дополнителни дози за ранливите групи и ја нагласуваат потребата од зајакнување на производството и проширување на пристапот до вакцината за што е можно повеќе луѓе.
ЕМА, исто така, објави дека одобрила две нови производствени локации во италијанските градови Монца и Анагнија.
Двете локации ќе произведат до 85 милиони дополнителни дози за ЕУ во 2021 година, рече регулаторот. „Фајзер/Бионтек“ се најголемите снабдувачи на Европската Унија со вакцината за ковид-19.