Откако пред еден месец беше усвоен Концептот за дигитална трансформација на општеството од страна на Националниот совет за истата намена со кој раководи вице-премиерката Славица Грковска, сега и Владата го усвои истиотдокумент.
Тој е резултат од проектот за унапредување на дигитализацијата во Северна Македонија, со финансиска поддршка од САД и Естонија и експертска поддршка од Естонскиот центар за меѓународен развој.
Имплементацијата на Концептот ја обврзува Владата да воведе електронска лична карта и да спроведе мерки за поддршка за поврзување на сите домаќинства на бродбенд услуги во следните 5 години.
За да се постигнат целите поставени со Концептот, ќе се формира Агенција за дигитализација, која ќе биде надлежна за управување со околината за безбедна размена на податоци, поставување стандарди за ИКТ и сајбер безбедност за сите засегнати страни, давање насоки за управување со промените при дигитална трансформација на администрацијата и подигнување на јавната свест за оваа проблематика.
Очекувањата се дека ова ќе претставува предуслов за напредок и во борбата против корупцијата и јакнењето на транспарентноста и доброто управување. Покрај подобрувањето на слободниот пристап до јавните информаци, една од клучните измени кои ги носи овој концепт е давањето предност на дигиталната верзија на записите и електронските потписи. Податоците што еднаш се внесени во јавен регистар, нема повторно да се бараат од физичките и правните лица, а дигиталниот потпис создаден со лична карта е еквивалентен со своерачен потпис.